t Evengelie volgens Matteüs 22
01Jezus sprak vannijs tegen heur in geliekenizzen:
02"t Hemels keunenkriek liekt hier op: der was ais n keunenk dij veur zien zeun n bruloft regelde.
03Hai stuurde zien knechten der op oet. Dij zollen, dij e veur bruloft nuigd haar, oproupen. Mor ze wollen nait kommen.
04Vannijs stuurde hai aander knechten der op oet. Dij zollen tegen lu dij nuigd wazzen, zeggen: 'Kiek ais, ik heb t feest veur joe kloar! Bollen en vedde kaalver binnen slacht. Ales is veurmekoar. Kom op bruloft.'
05Mor ze deden of ze niks heurden. Elkenain ging vot, ain noar zien laand tou, d'aander noar zien affeer.
06Der wazzen ook nog gounent, dij grepen knechten beet, tiggelden heur òf, joa, sluigen heur dood.
07Keunenk wer hoagels. Hai stuurde zien soldoaten der op òf en luit moordenoars ombrengen. Heur stad stook e in brand.
08Dou zee e tegen zien knechten: 'Ales was kloar veur bruloft, mor dij nuigd binnen, wazzen t nait weerd.
09Goa op kruuspunten stoan en nuig elkenain dij ie mor vinden kinnen.'
10 Knechten gingen stroat op en brochten elkenain mit dij ze mor vinden konden: minnen en besten - t was heur netgliek. Al gaauw zat feestzoal vol mensken.
11 Dou keunenk zoal in kwam om ais te kieken noar gasten aan toavel, zag e ain zunder bruloftsklaaieroazie.
12 Hai zee tegen hom: 'Mien laive man, hou bistoe zunder bruloftsklaaier aan hier heer kommen?' Doar wos man niks op te zeggen.
13 Dou zee keunenk tegen zien bedaindes: 'Knevel hom handen en vouten en smiet hom der oet, in t duustern. Doar zellen ze hoelen en mit tanden knaarzen!'
14 Hail veul binnen ja roupen, mor oetkeurd binnen der mor n poar!"
15 Farizeeërs gingen vot en onnaaierden mitnkander hou ze Jezus op zien aigen woorden vangen konden.
16 Ze stuurden heur leerlingen noar hom tou mit paardie lu van Herodes zien pertij. "Meester," zeden ze, "wie waiten dat ie n man binnen doar je van op aan kinnen en eerlieks zeggen hou of God wil dat je leven zellen. Ie trekken joe van gainain wat aan en kieken gain mensk noar ogen.
17 Zeg ons doarom ais wat ie hier van denken: mag wie kaaizer aal of nait belasten betoalen?"
18 Mor Jezus haar votdoalek deur hou filaain ze wazzen en zee: "Ie hugelders! Woarom wil ie mie der inlopen loaten?
19 Loat mie munt ais zain dij we veur belasten bruken." Ze langden hom ain tou.
20 "Wèl zien kop is dit en wèl zien opschrift?" vruig Jezus.
21 "Kaaizer zienent!" zeden ze. "Geef den aan kaaizer, kaaizer zienent," zee e tegen heur, "en aan God, God zienent!"
22 Doar stonden ze versteld van. Ze luiten hom mit vree en gingen vot.
23 Aigenste dag stapten Sadduceeërs op hom òf. Dat binnen lu dij ontstrieden dat doden weer opstoan.
24 "Meester," zo begunden ze, "Mozes het toch zegd: 'As n traauwd man oet tied komt zunder kinder, den mout zien bruier wedevraauw traauwen. Dij kin der den veur zörgen dat zien overleden bruier toch noazoaten krigt.'
25 Nou wazzen der bie ons ais zeuven bruiers. De eerste traauwde en kwam oet tied. Omdat hai gain kinder haar, kwam zien vraauw aan zien bruier.
26 Zo ging t ook mit twijde, mit daarde, joa, mit ale zeuven.
27 Op t leste kwam vraauw ook oet tied.
28 As ze nou oet dood opstoan, wèl zien vraauw zel zai den wezen? Ze hebben ja ale zeuven mit heur traauwd west!"
29 "Ie zitten der haildaal noast!" was Jezus zien antwoord. "Dat komt omdat ie de Schriften nait kennen en God zien macht ook nait.
30 As doden opstoan, traauwen manlu en vraauwlu ja nait mitnkander. In hemel binnen mensken ja net as engels.
31 En wat opstoan oet doden aanbelangt: heb ie nait lezen wat God tegen joe zegd het:
32 'Ik bin Abraham zien God, Isaak zien God en Jakob zien God?' Hai is gain God van doden mor van leventegen."
33 Dou t volk dat heurde, stonden ze versteld van wat hai heur leerde.
34 Farizeeërs heurden dat Jezus Sadduceeërs stil kregen haar. Ze kwammen weer bie nkander
35 en ain van heur, n wetgeleerde, perbaaierde hom der inlopen te loaten. Hai vruig hom:
36 "Meester, wat is nou vernoamste gebod in wet?"
37 Hai antwoordde: "Hol van de Heer, joen God, van top tou toon en mit ales wat in joe is.
38 Dat is t eerste gebod en ook t vernoamste.
39 t Twijde is krekt zo belangriek: ie mouten van joen noaste holden as van joezulm.
40 Haile wet van Mozes en aal wat profeten leerd hebben, draait om dizze twij geboden."
41 Dou Farizeeërs bie nkander stonden, vruig Jezus heur:
42 "Wat ducht joe van de Christus? Woar is hai n zeun van?" "Van David," zeden ze.
43 "Mor hou kin dat den," vruig e, "dat David hom, influsterd deur hillege Gaist, 'Heer' nuimt? Hai zegt ja:
44 'De Heer het tegen mien Heer zegd: "Goa rechts van mie zitten, aan tied tou dat ik vijanden joe onder vouten leg."'
45 Doarom: as David hom 'Heer' nuimt, hou kin e den tougelieks zien zeun wezen?"
46 Gainent kon hom doar antwoord op geven en net zo min duurde ain hom van dij dag òf aan nog wat te vroagen.
|